Tila hindi mamatay-matay na trope sa pelikulang Filipino ang pakikiapid ng mga may-asawa na para bang wala ng ibang tema na maaaring gawan ng pelikula, na para bang hindi batid ng manunulat at direktor ng Torotot (Destierro) na kahit basahan, matapos ang paulit-ulit na gamit, ay kinalaunan itinatapon din. Hindi mapakali ang pelikula—para bang nahulugan ng higad at kinakamot ang sarili na sana makarating ito sa dulo ng palabas.  Pamagat pa lang dama mo na ang naturang problema (kaya may subtitle para kunwari pa-profound). Lalabas ka ng sinehan na tila na-Batibot (educational pala itong pelikula!) dahil may ipinababatid na dalawang aral: (1) leksyon ng “destierro”; at (2) na size, still, does not matter—maliit o malaki man ang titi mo, paghusayin mo ang pagkantot.